புதிய எல்லை: ஹாலிவுட் முதல் வாய்ப்பில் தனுஷ் நெகிழ்ச்சி !

ஹாலிவுட் படத்தில் நடிக்க ஆர்வமாக இருப்பதாக நடிகர் தனுஷ் நெகிழ்ச்சியுடன் குறிப்பிட்டு இருக்கிறார்.

தமிழ், இந்தி உள்ளிட்ட திரையுலகில் முன்னணி நாயகனாக வலம் வருபவர் தனுஷ். நடிகராக மட்டுமன்றி தயாரிப்பாளர், பாடலாசிரியர் என்று பல தளங்களில் பணிபுரிந்து வருகிறார்.

தற்போது முதன் முறையாக ஹாலிவுட் படத்தில் பிரதான பாத்திரத்தில் நடிக்க ஒப்பந்தமாகி இருக்கிறார் தனுஷ். பிரபல ப்ரெஞ்ச் நாவலான 'The Extraordinary Journey Of The Fakir Who Got Trapped In An Ikea Cupboard' திரைப்படமாக உருவாக இருக்கிறது. இப்படத்தில் தனுஷூடன் இணைந்து ‎UmaThurman‬ மற்றும் ‎AlexandraDaddario‬ முக்கிய பாத்திரத்தில் நடிக்க இருக்கிறார்கள். இப்படத்தை Marjane Satrapi என்ற இரான் மற்றும் ப்ரெஞ்ச் படங்களின் இயக்குநர் இயக்க இருக்கிறார்.

ஹாலிவுட் வாய்ப்பு குறித்து தனுஷ், "’The Extraordinary Journey Of the Fakir Who Got Trapped In The Ikea Cupboard’ என்ற முழு நீள ஹாலிவுட் படத்தில் நடிக்க எனக்கு முதன்முதலில் வாய்ப்பு கிடைத்துள்ளது. இதில் நடிக்க நான் ஆர்வமாக உள்ளேன். படத்தின் இயக்குநர் மழ்ஜான் சத்ராபி இந்த கதாபாத்திரத்துக்கு நான் சரியாகப் பொருந்துவேன் என நினைத்தார்.

இதில் நடிப்பதன் மூலம் இந்த பாத்திரத்தின் பல அம்சங்களை என்னால் உணர்ந்து நடிக்க முடியும். எப்போதும் என்னுடன் இருந்து, நான் புதிய எல்லைகளைத் தொட, புதிய சவால்களை எடுத்துக் கொள்ள ஊக்குவிக்கும் எனது ரசிகர்களுக்கும், ஊடகங்களுக்கும் நன்றி" என்று குறிப்பிட்டு இருக்கிறார்.

இப்படத்தில் தனுஷ் நடிக்கவிருக்கும் பாத்திரத்தின் காட்சிகள் படப்பிடிப்பு ஜூன் மாதம் தொடங்க இருப்பதாகவும், இத்தாலி, மொரோகோ மற்றும் ப்ரான்ஸ் நாடுகள் இப்படம் படமாக்கப்பட இருப்பதாகவும் தகவல்கள் தெரிவிக்கின்றன.